Дастовардҳо муаррифгари факултет

Дар факултети “Электромеханика, иқтисод ва сохтмон”-и Донишкадаи энергетикии Тоҷикистон, бахшида ба Рӯзи энергетик, конференсияи байналмилалии дар пеш истода, ки рӯзи 22 декабр  баргузор мегардад ҳамчунин “Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф” таҳти унвони “Дастовардҳо ҳамчун муаррифгари факултет” намоиши дастовардҳо баргузор гардид.

Ба намоиш дастовардҳои илмӣ, китобҳову дастурҳои таълимӣ, методӣ, илмӣ-методӣ, лавҳаҳои амалкунанда, дастовардҳои варзишгарони факултет ва намунаи ҳунарҳои мардумӣ, ки ҳамагӣ маҳсули кори устодону донишҷӯён мебошанд, пешкаши бинандагон карда шуд.

Инчунин як гӯшаи намоишгоҳро дипломҳо, сертификату ифтихорномаҳо, ки аз конференсияҳои байналмилалӣ, ҷумҳуриявӣ ва вилоятӣ ба даст оварда шудаанд, оро медоданд.

Ректори Донишкадаи энергетикии Тоҷикистон н.и.к., дотсент Исозода Д.Т. баъд аз дидани дастовардҳои ба намоиш гузошташуда таъкид намуданд, ки дар самти корҳои илмӣ, навоварӣ, ихтироот ва омода намудани дастуру китобҳои дарсӣ вусъат бахшида шавад, зеро онҳо муаррифгари факултет мебошанд.

Исозода Д.Т. ба дастовардҳои пешниҳодшуда баҳои мусбат дода оид ба беҳтар намудани кору фаъолият, баланд бардоштани сатҳу сифати таълиму тарбия ва омода намудани кадрҳои баландихтисос, инчунин баргузор намудани олимпиадаҳо, мусобиқаҳои илмиву фаннии донишкадавӣ ва ҷумҳуриявӣ дастуру супориш ва тавсияҳои муфид доданд.

Дар анҷоми чорабинӣ декани факултет Воҳидзода З.Г., ректори донишкада, аъзои раёсат ва тамоми иштирокдоронро бовар кунониданд, ки таклифу пешниҳодҳо ба инобат гирифта шуда, камбудиҳои ҷойдошта бартараф карда хоҳанд шуд.

26-солагии таъсисёбии Ҳизби Халқии Демократии Тоҷикистон

         Рӯзи 10 декабри соли 2020 дар толори Донишгоҳи давлатии ба номи Н.Хусрав коференсияи ҷумҳуриявии илмӣ-амалӣ бахшида ба 26-солагии таъсисёбии Ҳизби Халқии Демократии Тоҷикистон таҳти унвони “Мактаби сиёсии пешвои миллат” баргузор гардид. Дар Конфересияи мазкур ҳамзамон бо тариқи онлайн тавассути васоити компютерӣ олимони муассисаҳои таҳсилоти олии кишвар ва намояндагони вазорату идораҳо ширкат варзиданд. Аз Донишкадаи энергетикии Тоҷикистон дар кори конференсия иштирок ва бо мақолаву рисолаҳои илмӣ се нафар: ректори донишкада, номзади илмҳои кимиё Исозода Д.Т., мушовири ректори донишкада Ализода А.А. ва номзади илмҳои техникӣ Раҳматуллоев А.З. баромад карданд.

         Мавзӯъи презентатсияшудаи ректори Доникадаи энергетикии Тоҷикистон, номзади илмҳои кимиё Исозода Д.Т. “Саҳми Тоҷикистон дар ҳалли мушкилоти глобалии истифодаи об” аз ҷониби Раёсати конференсия ва иштирокдорони он беҳтарин арзёбӣ гардид.

         Дар анҷоми қисмати расмии конференсия  Муовини Раиси Ҳизби Халқии Демократии Тоҷикистон Хайринисо Юсуфӣ ба як қатор фаъолону собиқадорони ҳизб, аз ҷумла ба мушовири ректори Донишкадаи энергетикии Тоҷикистон  Ализода Аҳмадҷон,  Ифтихорномаи Раиси Ҳизби Халқии Демократии Тоҷикистон муҳтарам Эмомалӣ Раҳмонро дар вазъияти тантанавӣ супорид. Аз номи омӯзгорону кормандони донишкада устод А.Ализодаро барои ба чунин қадршиносии Пешвои муаззами миллат сазовор шуданашон табрику таҳният мегӯем.

Аксияи тозагӣ

Бо ташаббуси Кумитаи муттаҳидаи иттифоқи касаба, дар факултети Электроэнергетикии Донишкадаи энергетикии Тоҷикистон, Аксияи экологӣ ва бехатарии муҳити атроф барои инсон гузаронида шуд.

Устодон ва донишҷӯён синфхонаҳо, биноҳои таълимӣ ва гирду атрофи хобгоҳро аз ҳар гуна маводҳои пластикӣ тоза намуданд.

Тасмим шуд, ки ин иқдом мунтазам гузаронида хоҳад шуд.

Дониш талабу бузургӣ омӯз…

Бахшида ба иди касбии энергетикҳои Тоҷикистон дар факултети Электроэнергетикии Донишкадаи энергетикии Тоҷикистон таҳти унвони “Ихтироъкорон ва техникони ҷавон” намоиши дастовардҳои устодону донишҷӯёни факултет баргузор гардид.

         Фаъолони факултет ректори донишкада н.и.к. Исозода Д.Т. ва дигар аъзои раёсатро истиқбол намуда ба толори намоишгоҳ даъват намуданд.

         Намоишгоҳ бо ҷомҳову дипломҳо, ифтихорномаҳо ва сертификатҳои гуногун, ки дар озмунҳои ҷумҳуриявӣ ва байналмилалӣ ба даст оварда шудаанд, оро дода шуда буданд.

         Аз ҷумла Аминов Дилшод барои корҳои инноватсионӣ дар энергетика, Қосимов Бахтиёр барои маърӯза дар мавзӯи “Энергетикаи хурд-дастовардҳои бузург” дар Федератсияи Россия қадр карда шудаанд.

         Дар намоишгоҳ дастурҳои зиёди методӣ, дастурҳои корҳои амалии лабараторӣ, дастурҳо оид ба васли дастгоҳҳои равшанидиҳанда, практикуми озмоишӣ оид ба масолеҳшиносӣ ва дигар дастурҳо, ки ҳамагӣ маҳсули кору дасти устодону донишҷӯён мебошанд.баҳри бинандагон пешниҳод карда шуда буданд.

         Як гӯшаи намоишгоҳро сертификатҳои барои таҷҳизотҳои энергетикии оид ба манбаъҳои барқароршавандаи энергия ба даст овардашуда оро медоданд.

         Дар намоишгоҳ лавҳаҳо бо макетҳои амалкунандаи энергетикӣ дар гӯшаи махсус ҷой дода шуда донишҷӯён тарзи кори онҳоро шарҳ медоданд.

         Дар назди факултет, аз ҳисоби донишҷӯён, гурӯҳи фаврии зудамал, иборат аз панҷ нафар амал менамояд, ки бо либосҳои махсус таъмин буда, дар мавриди дар донишкада ба амал омадани садамаҳо зуд онро бартараф менамоянд.

Ҷонибдорӣ

Раиси Маҷлиси милии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ, бо мақсади бештар сабзу хуррамгардонии шаҳри Душанбе ташаббуси наҷиб нишон дода ба сокинон баҳри ба “Шаҳри Сабз” табдил додани пойтахти Ватанамон муроҷиат намуданд.

Кормандону донишҷӯёни Донишкадаи энергетикии Тоҷикистон ин иқдомро ҳамчун давоми мантиқии сиёсати хирадмандона ва созандаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қабул карда, ҳамаҷониба дастгирӣ намуда, ҷиҳати сабзу хуррамгардонии ҳудуди донишкада, ба корҳои тирамоҳиву зимистонӣ вусъат бахшида, баҳри анҷом додани корҳои баҳорӣ омодагиҳои ҳамаҷониба гирифта истодаанд.

Ҳамзамон тасмим гирифта шуд, ки ҳар як корманд як дарахтӣ мешинонад.